اناااا بدي همبورجير .. المخلوق الارضي المزدهر

كيف الحال والاحوال .. مش عارف من وين بدي ابدا وبتعرفه اني بحبش اللف والدوران وانا ببدا مباشرة بدون شمال ولا يمين بدون حكي زيادة وبدون تعتيم اه اكيد بتقوله عني هسا اني بلف وبدور بعكس ما قوليت في البداية.. بس مسامحكم قولوا شو ما بدكم انا بزعلش وعكل حال هذيك المرة كنت احضر فيلم اجنبي وكنت متاثر بالقصة وبصراحة تعلقت بمشهد معين وكنت وقتها بجيل المراهقة وبتاثر من اي موقف حساس .. والمشهد هو انه البطل قاعد بوكل همبورجير , وبالصدفة امام هالمنظر كنت بالصدفة جيعان كثير , وصوريت اعظ عسناني واقول اخ لو هالهمبورنجير هذه معي (بتعرفه لفظها صعب بجيل زغير) , لاكلها بثوان بعد ما ادير عليها ملان كيتشوب , بس للاسف الساعة كانت متاخرة وحتى لو نويت اشتري همبورجير بقدرش لانه الوقت صار متاخر .. واحنا بعد نص الليل.. بس المشهد كان قاتل ومؤثر علي جدا وصوت معدتي من الجوع صار زي الحفلة ..
فكرت وفكرت وقوليت بالاخر خلص لازم اشتري همبورجير .. ثاني يوم المغرب قوليت لازم اروح اشتري همبورجير واتعشى واشبع (احححح مزكاه) .. وصوريت اتوهم اني شامم ريحته , واني بدير عليه كيتشوب ..
بس قبل ما اروح اشتري قالتلي امي .. وين رايح ؟ قولتلها خليني يما بدي اروح اشتري همبورجير وقوميت سالتهم اذا في حدا بدو اشتريله معي اشي .. قالتلي لليش بلزمش خليك بدي اعمل شوربة وجاج محشي .. قولتلها لا لا بدي همبورجير .. قاموا استغلوا اهلي الفرصة وطلبوا مني اشتري لاخوتي معي .. اشي بدو توست واشي فلافل واشي شوارما .. وانا عقلي بمشهد الفيلم الي حضرته .. منظر البطل وهو يفغم همبونجير ههههه تاخذونيش على اللفظ شوية صعوبة بلفظها ملزق بسناني بزر من فيلم ليلة مبيرح ..
وانا طالع من الدار كانت الشمس غايبة وكان اخوي فايت ولو شوي صدمنا ببعض .. نطزت وقوليت يبّاااااااا قصدي يمّاااااا , وهو قالي على شو مستعجل ؟ قولتله رايح اشتري .. وهو ماخذ راحته بدو يسالني شو بدي اشتري .. وانا مستعجل .. قولتله لما ارجع بتشوف .. المهم مرت الثواني والدقائق وشاءت الظروف اني وصلت المطعم .. طلبت من صاحب المطعم يحضرلي الطلبية , وانا شايف واحد قودامي بوكل شوارما .. صوريت اقول لنفسي الهمبورجير وبس والباقي خس ..
قعدت استنى بدوري وتبخرت من الزهق مرة احط ايدي على مخدة قصدي ع خدي ومرة احط اجر على اجر .. استنا واستنا .. ومن الانفعال لساني تعقد وشعرت انه وقف عن التحرك ودخل في حالة قشعريرة من الجوع ؟؟ المهم صار يقولي صاحب المطعم وهو يضحك ضحكة شرشبيلية قالي " كمان شوي بجهزوا طلباتك" .. وانا حاسس بنخزة بقلبي من القلق على شقفة الهمبورجير تبعتي وهي تتجهز وصار الفار يلعب في علبة اوبس قصدي بعبي .. بس الصراحة لما طلبت الي بدي اياه كان صاحب المطعم بقمة الادب والاحترام , وركزت وشرحتله بدقة عن شقفة المهبورجير تبعتي خليه يعملها زي ما قلبي بحب بالزبط وعدتله كلامي مرتين خلي ما يخربط , وهو يقولي فاهم فاهم الك لتكون ازكى همبورجير ذقتها بحياتك .. وانا كان نفسي اطلع لساني وامده خليه يوصل الفرن يسحب الهبمورجير ويرجع فيها على فمي بس للاسف لساني قصير .. المهم سالت صاحب المطعم شو الحساب ؟ قالي 80 شيقل .. ناولته 100 شيقل وقالي "شكرا ويعطيك العافية" جاوبته الله يعافيك .. المهم رجعلي الباقي ورد قالي "يعطيك العافية" افففففف رديت عليه الله يعافيك كمان مرة..
بديت اقلق الوقت بمر والطلبية مش جاهزة قعدت على الكرسي في المطعم وانا احرك برجلي واستنى .. واطلع على ملامحي البهية في المراية الي قودامي واحرك حواجبي واطلع وراي ليطلع حدا شايفني .. واخيرا وصلت الطلبية , اجاني صاحب المطعم وهو حامل الكيس وشعرت دقات قلبي بتتزايد وانا اتخيل الي بداخل الكيس وحاولت امسك نفسي ولكن عن غصبن عني دخّلت راسي بالكيس خليني اشم ريحة الاكل الشهية يااااااااااااه مزكااااه .. وبعد ما اخذت الكيس قالي صاحب المطعم كمان مرة "يعطيك العافية" خوثني بقولي اياها لثالث مرة .. قولتله الله يعافيكككككك (وبيني وبين نفسي قولت الله يشفيك شو شايفني بسقي بحديقة باديلي يعطيك العافية) وكان جاي عبالي اطلع من المطعم وانا اتحرك زي الرجل الالي من السعادة الي غمرتني ..
وبهذه اللحظة اتصلت امي على تلفوني تستعجلني وتسال عني .. قلتلها انا في الطريق .. بديت افرفر على الارض زي توم وجيري واستعديت للانطلاق 3 – 2 – 1 GO بيب بيب طوط طوط واو وي واو وي عامل فيها سيارة بوليص ... صوريت اركض واقفز عن الحفر .. وبالاخر وصلت الدار وانا الهث من التعب .. احترت وين اروح على الصالون ولا على المطبخ اسلمهم اغراضهم ولا اخذ الهمبورجير وبعدها يجو بنفسهم يستلمو اغراضهم . وقررت اني اروح على الصالون اسلمهم طلبهم وبعدها بوخذ اكلي وبروح على غرفتي بوكل هناك على راحتي .. وزي المعلم بالرحلة صوريت اصرخ (بيتة فلافل مع طحينية لمين ؟ ولي البيتا اله يقول انا).. ابوي صار يقولي وطي صوتك ولا شو رايك تطلع على الباب وتنادي هناك بلكي الشوارما تطلع للجيران ؟ قولتله لا لا انا بصرخ لاني متاثر من اللحظة التاريخية الي بعيشها بهذا الوقت .. انتي فاهمني يابا ؟؟؟ وهو يقول مجنون هذا الولد ولا شو ..
واخيرا انتهيت من توزيع طلبياتهم واخذت الكيس وروحيت على غرفتي .. بدي انفرد بالهمبورجير واووو فمي بدا يفتح ويسد زي الفخة وسناني تطرق ببعضها يعني كل الي ناقص اشوفها وامرمغها بالكيتشوب والمايونيز.. وبدكم الصراحة يا انا يا هيا بالدار .. بدي اشوفها وهي تتقطع بسناني .. الهمبورجير الشريفة العفيفة اللطيفة الظريفة .. وقال يعني اخذت معي محارم وصحن وحطيتهن على الطاولة .. مديت ايدي بالكيس وسحبت منه حفنة طلعت الكيتشوب والمايونيز ..
وانا بستعد للحظة الحاسمة ... ايتها السيدات والسادة اريد ان ابكي من الفرحة (هههه عامل فيها دراما) .. كل هذا استعدادا لاستقبال الهمبورجير .. مديت ايدي بالكيس كمان مرة وسحبت كمان شيء طلعت علبة البطاطا .. بس بعد ما سحبت علبة البطاطا .. شعرت ان الكيس فضي !!!! قعدت ادور يمين ويسار لتروح متخبية مني بس بعقلي بقول ليش بدها تتخبى ما انا مش غريب وفوتيت راسي بالكيس للتاكد .. وفي النهاية اكتشفت انه الكيس فاضي فعلا وحافني القلق والخوف على مصير الهمبورجير والاهم من هيك شو بدو يسكت معدتي .. وانا اسال حالي وين راحت وليش راحت ؟؟ (وحطيت ايدي على راسي وانا قول وين وين راحت؟).. روحيت ارمح عند اهلي لاني خفت اني معطيهم اياها بالغلط , لقيتهم كلهم وصلت طلباتهم كاملة وما حدا لمح شقفة همبورجير هاربة .. دورنا كمان مرة يمين ويسار وما لقيناها وتاكدت انه الموضوع دخل بالسياسة هههههه..
اجتني الصيحة وصوريت اشاهق من القهر واهلي يطبطبه على ظهري وانا اقولهم ابداااااااااااااا مش رح اوكل اشي غيرها انا بدي اياها ومش رح انساها لانها كل حياتي .. يمااااا يابااااا بدي اياها .. امي قالت ابداااااااا انهي تعليمك بالاول وبعدها بنطلبها .. OOPPSS مبين الموضوع تحول قصة عاطفية .. والكل يضحك علي .. وانا ارفع راسي وارجع انزله لاني انفضحت .. قال اخذت الكيس تبعي وبدي اوكل بغرفتي وانفرد فيها ..
ومن الزعل بديت اوكل بالمطبخ زي المساكين وصوريت اتذكر صاحب المطعم وهو يقولي "يعطيك العافية" وشو اجاني من وراه غير وجع البطن .. وفكرت اني ارجعله لانه ما حطلي اياها بالكيس بس لقيت الوقت صار متاخر , وانه اجا معاد نومي ..
امي حطتلي سلطة مع بطاطا وصرت ليلتها نكتة اهلي والكل يضحك علي .. وانا اعمل نفسي بصفر ومش قلقان وعامل حالي مش سامعهم ..
وللتوضيح ما زالت المحاولات مستمرة حتى هذا اليوم للوصول الى قطعة الهمبورجير على امل ان التهمها لاني ما رجعت للمطعم المذكور من هذاك الوقت ..
وتشاو بعلبة كاكاو ..
للي بدورلي على طريق ما في امل حتى لو بحثت عني انتي وفريق..
- المخلوق الارضي المزدهر -
المخلوق الارضي المزدهر : سروال ستي ضيع عمري
كلمات انسانية مؤثرة من اعماق روحه المخلوق الارضي المزدهر