حصريا : المخلوق الارضي المزدهر ودفتره لما كان زغير

اذهب الى الأسفل

default حصريا : المخلوق الارضي المزدهر ودفتره لما كان زغير

مُساهمة  Admin في الإثنين يونيو 09, 2008 7:01 am

المخلوق الارضي المزدهر هذه المرة يعود في الذاكرة اكثر من 20 سنة الى الخلف ...
المخلوق الارضي المزدهر هذه المرة يعود في الذاكرة اكثر من 20 سنة الى الخلف .. مع دموع في عينيه يتذكر دفتره , نعم انه دفتره الذي كان يحكي له حياته الغريبة والتي حولته الى اغرب الاشخاص الموجودين على الكرة الارضية .. نترككم معه , استقبلوه من جديد , انه المخلوق الارضي المزدهر ..
- المخلوق الارضي المزدهر-

اهلا زوار بانيت حبايب اهلكم , هلا والله .. كيف الحال وشو عاملين .. برجع لدفتري القديم , وبتذكر كان يوم سبت .. فتحت عيوني ادور على نقطة ضوء .. قاموا امروني اهلي اغمض , وفعلا غمضت وبعدها ما شفت لا ابيض ولا اسود لانو كانو مسكرين الشبابيك واللمبة مطفية في الغرفة والظاهر اني صحيت بدري من نومي كانت الساعة 4:30 وجه الصبح ويبدو انه كان لازم علي انام كمان شوي ...

الاحد : كنت اسمعهم بقولوا لولد صاحي بدري وقاعد بصرخ باعلى صوته بالحارة .. يا حمار .. يا ثور .. يا بقرة .. يا لوح .. يا تيس .. فتوقعت اني في حديقة حيوانات , فتحت عيوني بدي اشوف هالحيوانات الي بنادوا عليها .. قاموا قالوا لي : " بتقدرش تشوف اشي بدون ما نقولك سامع !! ... وعاد انا دخلت راسي تحت اللحاف كمان مرة .. وعشان اجننهم اطلعت راسي ع السريع وقلتلهم طيب بقدر اشوف العصفور .. صرخوا في وجهي "انطم وغمض" وبصراحة انطميت بس ما غمضتش (تخيلوني ملذني ههههه ) !!! ...

الاثنين : سمحولي اشوف تلفزيون .. كنت لحالي منسجم مع افلام الكرتون .. دخلت امي وكان ابو كابتن ماجد ببوس ام كابتن ماجد .. ركضت امي غيرت المحطة وصرخت باعلى صوتها .. "عيب عليك قاعد بتشوف قلة ادب" .. اطلعت عليها بكل براءة وانا متعجب من الي صار , وطيب شو صار ؟ ابو ببوس مرته يعني ام ابنه ... قالت لي امي وهي مبوزة "التبويس قلة ادب" ..

بعدها باسبوع شفت امي بتسلم على جارتنا وبتبوسها , قلتلها وانا كلي اسى " يما التبويس قلة ادب"..

الثلاثاء : كانوا بنات عمي عنا , وكنت الولد الوحيد الي بلعب معهن وابوي يقعد يبحلق عينيه فيي وين ما اروح ووين ما اجي والظاهر والله اعلم انه قاعد بتحلفلي (لن اتكلم الا بحضور المحامي بتاعي) .. وبعد ما راحوا بنات عمي ناداني وقالي : " عيب الواحد يقعد مع البنات هذا بتسمى قلة ادب" ..

بعدها بأكم يوم كان ابوي قاعد مع عماتي , طليت عليه بطرف عيني وانا اضحك وراسي على الارض , وبدكم الصراحة كنت عاضض سناني على شفتي .. وقولتله يابا يابا , قالي نعم ... جاوبته الي بقعد مع نسوان قليل ادب .. وهربت .. عماتي صرن يضحكن وابوي قالي تعال ل ل ل ل , انا فلخت زي الصاروخ ورا الدار بصراحة حبيت يقوملي ويحاول يمسكني لانه جاي على بالي العب اللحقة هههههه ..

الاربعاء : كنت اسمعهم يقوله الزعما العرب ضعاف .. قوميت زقيت حالي وقوليت طب ما زالهم ضعاف ليش ما يوكلو خليهم ينصحه شوي .. قاموا قالولي اسكتتتتتتتتت .. وسكتت وكملت حكي بعد الفاصل الاعلاني هههههههه..

كنت اسمعهم بقولوا انهم بحبوش مستر بين ,, قوميت كرهته ومن كل قلبي .. بس لما مسكتهم بشوفه بحلقاته وبضحكو , سالتهم ليش بتضحكوا منتو بتقوله انكم بتكرهوه , قالولي اسكت وانطم .. وبصراحة انطميت برضه لفترة محدودة ..

الخميس .. ابوي بقول التدخين حرام .. وانه الي بدخن بروح على النار .. وفي يوم شوفيت ابوي قاعد مع صديقه ابو احمد , وابو احمد ماسك سيجارة وبدخن , وقفت وبكل ثقة سالت ابوي " طيب يابا الي بقعد جنب واحد بدخن بروح على النار؟" ... قاموا ضحكوا .. وواصلت طفولتي البريئة ...

والجمعة : بسمعهم بقوله انه الي بقعد يحكي بالتلفون على جنب او بروح على الكنيون كثير فاكيد هو تبع نسوان .. وانا في يوم كنت استنى بابوي بدو يوخذني على البركة وكان يحكي بالتلفون على جنب وانا مش قادر اصبر وللاسف بتنبلش بثمي فولة .. وصار يلعب الفار في علبة قصدي في عبي واتذكرت الي سمعته عن الي بحكو على جنب .. فهجمت على امي ومن سرعتي لو شوي طرت عن وجه الارض .. وانا اصرخ من بعيد يمااااااااا يماااااااااااااا .. امي رمت الي بيدها وقالتلي مالاك شو في؟ احكي !! .. وقال يعني انا مصدوم ومشاعري محطمة وبلهث من التعب , واقولها يما الحقي ابوي ... صارت تقولي ماله ابوك !!!!!!!!!قولتلها بحكي بالتلفون على جنب .. وخربتها بين الاثنين .. وعاد طلع ابوي بحكي مع اخوه عن موضوع شخصي بخص اخوه ..

شايفين كيف البراءة بتودي بمليون داهية .. بس شو بدي اعمل بظل الكل يحبوني .. وبمجرد اني انام الكل بفقدوني .. زيكم انتو زوار بانيت .. بتحبوني موووووووووووو ؟ يعني قال بسالكم بالسوري .. سامحوني ..

يلا تحاولوش تتخيلوني.. لانكم بعد لحظة مش رح تلقوني ..تشاووووووو بعلبة كاكاو .. -المخلوق الارضي المزدهر

Admin
Admin

عدد الرسائل : 233
تاريخ التسجيل : 08/06/2008

معاينة صفحة البيانات الشخصي للعضو http://medhat.yoo7.com

الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى